for-my-feelings

[for-my-feelings]

هي اهم… هي قبل…٠

[for-my-feelings]

تراودني فكره اني اوقف العلاجات… واشوف الدنيا وين بتوصلني

[for-my-feelings]

كذاب-

ما ادري الصراحه ليش تلف وتدور في الاجابات! ليش ما تقول انك بتطلع معاها من البدايه؟

لا انت بتروح المحل الفلاني تاخذ الشغله الفلانيه وتاخذ اربع ساعات!!! بالغلط انت مو قصدك تروح عندها بس مريت وخذتكم السوالف ومو قصدك انت بس بتروح المحل تاخذ شيء بس سبحان الله طلعت في نص الطريق!!٠

والله بديت احس انها صج شريكتي… مو معقول يوم لي ويوم لها! وديتني هالمكان لازم توديها! بقاره ترا ،وكله مو قصدك

ماراح ازعل اذا قلت مشتاق وبتروح لها بس لا تستغفلني كذا وان مو قصدك تروح وخذتكم السوالف

وترا ما فرقت اجازتك ابدًا ،انتبه من النوم ما اشوفك ،مشغول وتعبان وبالك مو معانا ،بتطلع كل يوم تدور لك اي شغله اربع خمس ست ساعات ،ترا نفس الوقت اللي نجلس فيه كل يوم في البيت وننتظرك تجي من الدوام! لهالدرجه ما تقدر تقعد معاي؟ وهذا انا والله اسكت وما اعاتب والزعل اخليه بيني وبين نفسي كل ليله وحتى السوالف صرت اختصرها والغي نصها لدرجة ان صار ما في وقت خاص للكلام بيني وبينك… دوري زوجه بس مقتصر على الخدمه والطاعه والاحترام …ماراح تعتبرني شريكة حياتك

اخيرًا اعترفت نفسي… انا ماراح اكون شريكة حياتك

انا وين وانت وين… بيننا جبل كبييييييير حاولت بس ماراح اقدر اعبره

[for-my-feelings]

والله اني احاول انسجم معاك قد ما اقدر، بس بعدك وانشغالك المستمر يصعب الموضوع عليّ

[for-my-feelings]

19 Sep 2024

…

لا اعرف ماذا اكتب… وكيف اصف شعوري…٠

لكني محطمه وهذا الاحباط نتيجة لتوقعاتي واحلامي الوهميه وانا المسؤوله عن هذا الشعور ولا ذنب لأحد… فالذنب الاول والاخير يعود لي لأنني استمر في وضع تخيلاتي طوال ايام الاسبوع ولهذا اتحطم في نهايته…٠

طوال ايام الاسبوع احاول ان اتجاهل احتياجاتي ورغباتي ،اتجاهل تعبي لاستطيع ان اخفف تعبك ،ابتسم لك عند دخولك وخروجك واثني كل جهد منك ،احاول ان لا احملك اي شعور سلبي ،واتجاهل الساعات الطويله التي اقضيها بمفردي بين اربع حيطان والروتين اليومي… لكني ابدوا حمقاء وانا اعتقد اني سأجني حصاد الاسبوع وانسى كل شيء في عطلة نهاية الاسبوع… او على الاقل يوم الجمعه فقط… لكن كالعاده لا شيء جديد نفس الروتين والواجبات اليوميه لكن يكون وجودك اضافه… اضافه لا تحدث فرق بل قد تزيد العبء احيانًا…٠

[for-my-feelings]

بر الوالدين!٠

مفهوم بر الوالدين لدى الوالدين نفسهم مفهوم خاطىء …!٠

هل بر الوالدين يعني ان احقق رغباتهم على سبيل رغباتي وحياتي؟

هل بر الوالدين ان اوافق على الزواج من شخص معين لا ارغب به؟ "فقط بسبب صلة القرابه"، على الرغم من وجود خاطب اخر بنفس الصفات لكن اصبحت هذه الصفات سيئه وغير جيده ،وحسنه وممتازه ان كانت هناك صلة قرابه!٠

ام ان بر الوالدين هو ان يحددون لك التخصص الدراسي وفق لرغباتهم وماذا سيقول الناس ان ابنائهم اصبحوا في المستقبل؟

ان لم يستطيعون على تخصصك الدراسي اذًا ادرس ما تشاء لكنك يجب ان تكون في جهة عمل معينه حتى وان كانت لا تناسب تخصصك لا بس! اعمل هناك كعامل نظافه المهم انك تعمل في هذه الجهه…

ام ان بر الوالدين هو ان انفذ واطبق اعمالهم المنزليه او اعمالهم الشخصيه وحتى رغباتهم الجنسي��! وان اعترضت اصبحت من المغضوب عليهم!!٠

لا تهم راحتك النفسيه فالمهم هو ان تكون عبد لتحقيق راحتهم هم…٠

هل هذا هو مفهوم بر الوالدين؟ الذي لا استطيع دخول الجنه الا به؟

[for-my-feelings]

السكوت علامة القرف!٠

انا ثرثاره مع الاشخاص اللي يحبوني صج والاشخاص اللي تهتم لي وتهتم لكلامي

شنو الفايده من اني اتكلم لشخص وانا ما اعني له اي شيء!٠

[for-my-feelings]

…

مو مهمه بالنسبه لأحد.. الكل يدور مصلحته

[for-my-feelings]

من البر انك تسوي اشياء ما تبيها وما ترتاح فيها

انك تسوي واجباتهم وهم يرتاحون في سبيل اخفاقك في واجباتك

[for-my-feelings]

شنو فايدة القهوه نهاية اليوم وقبل ما اروح انام؟

بكل بساطه انا اشربها مو لاني ابي اصحصح او اركز في شيء ،بس اشربها لاني ابي اضبط مزاجي واجلس شوي مع نفسي لحظات هادئه بعيده عن كركبة اليوم والازعاج اللي صادفني

[for-my-feelings]

في نهاية اليوم …٠

الفقره التي يهدأ فيها كل شيء ويبدأ ضجيج العقل والقلب والعظام ايضًا… لا شيء يظاهي الراحه التي تأتي بعد الاستلقاء على السرير نهاية اليوم بعد يوم حافل بالحركه ،اشعر وكأن كل عظمه تعود الى مكانها الصحيح على عكس قلبي الذي يبدأ بالضجيج واثارة المشاعر وعقلي الذي يبدأ بكركبة الافكار واحده تلوى الاخرى

[for-my-feelings]

نفس العباره اللي قلتها انت!

اللي كان واقعها على قلبي كبير.. 

نفس الكلمه بس اذا انت قلتها يصير مو من حقي ازعل عليها 

واذا انا قلتها يصير كأني ارتكبت ذنب واثم عظيم واني غلطت في حقك! 

فكر مره ثانيه.. حلال عليك تجرحني وتأذي قلبي بكلامك اللي مثل السهام ،وحرام عليّ اقول لك نفس كلامك؟

[for-my-feelings]

12:13AM

يا نفسي لو تبكين دم من الان للظهر ما احد داري عن هوا دارك

[for-my-feelings]

ليتني نفسك

احب نفسي واقدمها عن كل شيء حتى لو كانت المبادىء والقيم والحب

كانت نفسك اولًا في كل شيء ،على سبيل راحة اي احد وصحته ، كنت تفضل نفسك على الكل ولا زلت

اما انا كنت احط اكل شيء وفي المقدمه انت وان كان مجال لنفسي ولا مو مهم اكون موجوده

[for-my-feelings]

!التواصل المسموم

نفس كل يوم اجلس واحرص على وجباتك وراحتك، انظف واغسل وارتب وابخر البيت قبل ما تجي، واحاول قد ما اقدر اجهز سناك خفيف او حلى او اي شيء تقول مشتهيه واقول لك من عيوني عشان تروق عليه اذا جيت ويكون وقت بسيط نتواصل فيه ونسولف شوي مو شرط نتناقش عن شيء معين بس احرص انه يكون فسحه بسيطه في منتصف اليوم نجلس مع بعض وننسى تعب اليوم

حريصه جدًا على موضوع التواصل.. حتى لو كان يومي مزدحم وجسمي مرهق بس اتواصل معاك احس كل شيء راح ،حتى لو كان تواصل بصري بس يكفيني ويجبر تعبي..٠

الا انك حريص تهدم هاللحظات بنقاش حاد وصراخ او تحطيم او تجاهل او استغفال.. ادور قد ما اقدر عن وقت بسيط يجمعنا ويملينا طاقه بعد ما استهلكت طاقتنا من الصبح ،وقت للعائله تجمعنا ضحكه وحب ومشاعر .. حتى لو ما اهمك ،بعد مو مهم ولدنا يعيش في بيئه صحيه يشوف اهله كلهم ملتمين ومهتمين لبعض!٠

اسئلتي الممله بالنسبه لك واللي غالبًا ما ترد عليها او تعصب اذا قلتها مو سببها فضول وتطفل وتتبع لك ولحياتك "اللي المفروض اذا تعتبرني شريكة حياتك تشاركني حياتك صج"٠

انا كل همي يصير عندنا تواصل شوي.. مهم بالنسبه لي اننا نسولف ونتكلم "حتى لو ما صرنا نتكلم عن الاشياء المهمه والمصيريه واللي المفروض اي زوجين يتفقون عليها " على الاقل نسولف عن اي شيء ،نسمع صوتك في البيت ،مو اذا حاولت افتح سالفه او موضوع صرت بركان هايج وتعصب كأني سابتك! انا ابي علاقه وبيئه صحيه ننموا فيها ،يعني مثلًا لو سألتك عن وضعك اليوم واذا كنت مشغول مو لاني ابي اتجسس عليك واخرب خططك وازعجك واتدخل فيك او اني احقق معاك او اني ابي اشغلك في شيء ثاني او اني اقول لك لا! ابدًا ما افكر في شيء كذا ،كل اللي ابيه اننا نسولف ونضحك ويصير لنا وقت خاص لو قلت مشغول او فاضي مو هذا موضوعي في النهايه انا بقول لك تصلح لعبة ولدنا بس! هذا كل اللي ابيه لانه ينتظر بطل خارق يصلحها له واكيد ان البطل في حياته هو انت! لانه في نظره انك تقدر تصلح كل شيء وانك تعرف لكل شيء والموضوع بسيط اصلًا عليك وما ياخذ وقت بس عشان يحصل على وقت معاك يحس انك مهتم له ومعاه ،وتعوضه عن باقي اليوم اللي انت مشغول عنه

والله تعبت من كثر ما الاحقك وادور عن اي طريقة تواصل بيينا او عن اي طريقه اعرف اخبارك فيها ،تعبت من كوني بقره تلحق شخص لانها تفكر انه يحبها وبيهتم فيها وهو ياخذها طريق المسلخ عشان يذبحها

وخلينا من البيت وترتيبه وتنظيفه ،ارتب نفسي واختار ملابسي وانا اقول هذي القطعه بتعجبه او بيحب هالستايل او من زمان ما لبست له كذا واختار العطور الهاديه الخفيفه وانوع كل يوم في الاكسسوارات واغير تسريحة شعري ،المهم يشوفني بصوره حلوه وخصوصًا او ما يرجع من الدوام اقول في نفسي الحياه قست عليه برا البيت لازم يرتاح اذا جا ولازم اتفرغ واستقبله بحب اذا جا … وعلى العكس يقابلني ببرود وتجاهل وكأني شيء اقل من عادي مر عليه خلال اليوم..٠

انا مو سلعه تشتريني عشان اريحك وادور راحتك وبالطقاق اللي يطقني انا وراحتي وانا مو شيء عادي ومو شيء يمر كذا بسهوله ،انا ادري اني استحق الحب والتقدير استحق ان يكون شريكي كفو لي ،ما استحق اني اجلس بالساعات وممكن بالايام زعلانه ومتضايقه وشايله في خاطري ،ما استحق اني اجلس اصيح اخر الليل لحالي ولا احد يدري عني ،ما استحق اني اكتم في قلبي هموم وحزن وما اتكلم لأحد ولا احد يهتم لي ،انا اذا اهتميت لك وجلست اخفف عنك تعبك ابيك تحس بدوري وتحس شكثر انا خايفه عليك وادور راحتك حتى لو على راحتي وعلى صحتي

والله لو خسرتني راح تخسر اشياء كثيره انت مو حاس بقيمتها الحين…٠

[for-my-feelings]

صار لي اسبوع او اكثر متحمسه هذا اليوم وادعي من كل قلبي ان ما يخرب عليّ شيء معين

ومتوتره انه يصير وتتغير الحسابات والخطه

جا اليوم المنتظر وكلي حماس، وفرحه اكبر ان اللي خايفه يخرب عليّ ما صار

ومفاااااااااااجأه

صار شيء ثاني ما عملت حسابه وما توقعت يصير

[for-my-feelings]

منقهره من نفسي ومنقهره من ردة فعلي بعد كل هالحماس والانتظار

بس الحمدلله ،وان شاء الله الله يعوضني بشيء افضل مما كنت متوقعه