faith-hihb

[faith-hihb]

انا بكرهه الtexting

الشات بالنسبالي ماهو الا وسيلة لتوصيل كلمتين تلاته بالكتير او سؤال عابر سريع لشخص مش قادره اتصل بيه حالياً لظروف محيطة حواليا ..

ليه اكتب لما ممكن اسمع اللي بيكلمني ويسمعني ونفهم بعض اكتر

ليه بنصدر لبعض فكرة قطع العلاقات والانغلاق وتجنب اي نقاش اكتر من دقيقة

ومبقاش عندنا خلق نسمع حد ولا نتكلم احنا نفسنا مع اي حد

في ايه يا جماعة ليه التوحد دا!

انا لو مش عارفه اتصل ببعت Voice notes ، بسجل ڤيديو وابعته اقول فيه اللي انا عيزاه

ايه في الدنيا الطف من انك تسمع ضحكة حد معاك على التليفون بدل ما يبعتلك ايموجي ولا يكتبلك hahahha !!!

حتى لو مش هنقول حاجة مهمة حتى لو مفيش مواضيع انا صوت صحابي واللي بحبهم بالنسبالي والله بيغيرلي مودي وبيخلي اليوم خفيف ومريح

زعلانة من حد اكلمه احسن من الحروف اللي ملهاش طعم، مبسوطة وعايزه اشارك حد معايا فرحتي ابعتله vn بصوتي اقوله، محتاجة خدمة من حد اتصل على طول اسأل واستفسر لعل وعسى نبرة الصوت تساعد في اي معلومة

زمايل بقى جيران معرفة صحاب اياً كان المسمى بفضّل اني اتصل، لو مش قادره اشوفهم على الحقيقه يبقى على الاقل نسمع بعض دي ابسط التصرفات.

[faith-hihb]

I saw you in my dreams last night.

It felt so real.

[faith-hihb]

18.7.2023

استلمت الترخيص والمزاولة والاقامة

ومن بكرا رسمي لوحدي

دعيت ربنا كتير اوي والحمدلله اللي كان نفسي فيه اتحقق

الحمدلله يارب الحمدلله على كل تفصيلة صغيرة وكبيرة حصلت

[faith-hihb]

عُمري ما امنت بموضوع صحوبية بين الجنسين دي

او ان يكون ليا بيست فريند ولد ولا انا بيست فريند لواحد

ونبقى قريبين لبعض وعارفين كل حاجة عن بعض بقى والجو الاهطل دا

العلاقة بين الراجل والست مش بتطلع برا ال٣ ابوشنز المعروفين

حد من المحارم، زميل دراسة او عمل، زوج

غير كدا بالنسبالي ف احنا بنضحك على بعض ومهما قولنا دا زي اخويا دا اختي يابنتي

ف وارد اوي وطبيعي اووي ان يكون في مشاعر بعد فترة او نظرات وتخيلات مش في مكانها للشخص التاني ودا غصب عننا لأننا بشر.

[faith-hihb]

مش قادره احب الحاجات اللي بين البينين

الحاجات اللي ملهاش ملامح يوم حلوة ويوم وحشة

يوم مفهومه ويوم مش قادره استوعبها

حاجات مش معروف ليها معنى ولا ليها اخر ونهاية

اي باب متوارب بالنسبالي بحب ارزعه في وش اللي قدامي

حتى لو الرزعه دي هتعلم في قلبي وقتها

بس هتريحني وهتعرفني وتعرف اللي حواليا حدودي و اولوياتي

اصحاب اللون الرمادي مبيسلكوش معايا ولا لينا سكة مع بعض ابداً.

[faith-hihb]

انا بكره اللون الرمادي

مبطيقش التخيلات والاحتمالات والكلام اللي بيحمل معناين

وشوق ولا تدوق والازدواجية قي التصرفات

كل دي حاجات بكرهها جداً يا ابيض يا اسود في كل امور حياتي

اما الرقص على السلالم والبَهَتان دا مش سكتي

[faith-hihb]

اكتر وصف بيتقالي في حياتي اني قوية وجدعة

على قد ما بيفرحني وحاجة جميلة ان الكبير والصغير شايفني قوية

بس ساعات بكره قوتي دي، ساعات بقول ياريتهم شايفين الجزء الضعيف اللي فيا

ياريتهم يخافوا عليا بدل ما بيتقالي دايماً انتي ميتخافش عليكي

[faith-hihb]

على قد ما انا اجتماعية ومعارفي كتير وبقعد وسط ناس كتير اوي اوي وكل مجموعة ملهاش علاقة بالتانية، الا اني دايماً بحس الناس دي كلها مش شبهي ولا انا شببهم

ورغم ذلك بعرف اجاري الكل واحسسهم اني معاهم على الخط واتعامل مع كل واحد بطريقته ودماغه

[faith-hihb]

شدوا كرسي للناس دي وقعدوهم وافتحوا معاهم اي كلام

اسأله واضحك في وشه وهزر وحسسه ان وجوده مرغوب فيه

فهمه الكلام اللي بيدور دا عن ايه واشركه معاكم في الحديث

ومحبكتش نتكلم في حاجات شخصية واسرار ونتوشوش كتير قدامه

نتصرف بعقل وحكمة شوية واللي نحبه يتعمل معانا نعمله.

[faith-hihb]

مبحبش اشوف حد منبوذ او لوحده او اللي حواليه ظالمينه في التصرفات والنظرات والمعاملة ومهمشينه

بتحول فجأة لمحامي في قضية شرف بيدافع عن الشخص باستماتة وانا يمكن اساساً معرفوش واول مره اقابله النهاردا !

ليه في قعدة او مكان شغل او مناسبة او اياً كان نسيب شخص قاعد لوحده وساكت ونضحك احنا ونهزر ونعمل صحاب وجامدين وهو مهمش لمجرد انه وجه جديد في المكان؟

ولو اتكلم وحاول يدخل معانا في اي نقاش او حوار او يواكب الجو نضحك ونتريق ومنهتمش بكلامه ؟

بالنسبالي دي قلة زوق ونضج !

[faith-hihb]

اكيد ربنا مبيعملش غير الصح والمناسب لينا

مش قادره ومش عايزه اشيل هم بكرا والمستقبل

واثقه ومتأكدة ثقة عمياء حقيقي ان رب الخير لا يأتي الا بالخير.

[faith-hihb]

انا نفسي الناس تعاملني زي ما بعاملهم بالظبط لا تتقص ولا تزود.

[faith-hihb]

دايماً بتخيل بيتي هادي ودافي والوانه كلها بين البيجات والفواتح

والشبابيك فيه كبيرة بيدخلها الشمس من كل حتة

وفي كل اوضة فيه ابچورة حلوة اوي نورها خفيف مريح للعين مع ريحة البخور اللي بحبه

وفي حيطة عليها براويز صغير وصور ليا مع اللي بحبهم للحظات جميلة متتنسيش مع الPartner او مع اولادي او اهلي وصحابي

والمطبخ دايماً متروق وريحته حلوة وفيه كل انواع الشاي اللي في الدنيا ومجات وكوبايات كتير جداً

والصالة فيها فازة مليانة ورد ابيض طبيعي بغيره كل كام يوم

وشاشة تلفزيون كبيرة شغال عليها وقت العصر صوت المنشاوي

والارض نضيفة وبتلمع مفيش تراب ولا كركبة وانا في المطبخ بجهز اكل عزومة بكرا

[faith-hihb]

معرفش دا تلكيك عشان الليركا ولا فراغ القعدة والوحدة

بس انا نفسي اختفي

اختفي تماماً ومدة كبيرة اوي لحد ما اتنسي

[faith-hihb]

It’s 10 am and I feel so sad.

[faith-hihb]

تليفوني بقاله شهرين ونص مرنش غير ٥ ٦ مرات

محدش بيكلمني ولا بخرج ولا بشوف حد

النقلة اللي حصلت محسساني بوحدة رهيبة

وبتخليني اتصرف تصرفات هبلة

لمجرد اني محسش ان انا لوحدي

بس انا بكتب الكلام دا عشان لما الفترة دي تاخد وقتها وتنتهي

ويبتدي وقتي ينشغل ويبقى ليا حياة جديدة في البلد المعدومه دي

اشوف الكلام دا واضحك

[faith-hihb]

اوقات بحس اني مش قادره اتنفس من كتر الحزن اللي جوايا

رغم ان مفيش دمعه واحدة بتنزل مني او صوتي حتى بيتغير