beetgdid - Tumblr blog

[beetgdid]

مع الوقت والمواقف والناس اللى بتروح وتيجى اكتشفت ان بقالى وقت كبير اووى معملتش حاجه لنفسي

افتكرت انى زمان كنت لما اتخنق من كل حاجه حواليا ادخل قوقعتى (قوقعتى كان اسم مجازى لعزلتى فى اوضتى واقفل موبايلى وابعد عن اى تدخلات خارجيه) بس مع الوقت حتى قوقعتى ضايقت ناس منى وسمعت اقوال كتير من نوعية بلاش كأبه وعيشى حياتك وبلاش نكد والكلام ده

وبالرغم من ان قوقعتى بالنسبالى عمرها ما كان فيه أوقات زعل او نكد او اى شعور بالكأبه.... قوقعتى كانت بالنسبالى أنا هدوء وراحه وفصلان ومراجعه لنفسي واستراحه لروحى من تعب البشر إلا انى من فترة كبيرة حبتين سمعت كلامهم وبطلت أدخل لقوقعتى دى نهائى مش عشانى خالص بس عشان مضايقاهم هما

وبدأت رحلة صعبة مفيهاش اى انواع غسيل للروح.... الروح اللى تعبت فعلا من كل البشر... من كل أحكامهم وأفعالهم وبرودهم وعدم اهتمامهم

ومع ذلك انا كنت مهتمه فى عز التقصير معايا كنت موجوده جنبهم.... فى عز اللامبالاه منهم كنت مهتمه..... فى عز ما كان نفسي بيخلص فضلت أجرى وراهم.... فى عز تعبى وقلة حيلتى كنت بسعى انهم يبقوا مبسوطين

ناس كتير أوووى حواليا انا جيت على نفسي وراحتى وأعصابى عشانهم

وللاسف النتيجه مش مرضيه أبدا عشان كل اللى قدمته ولسه بقدمه بقي بالنسبالهم حق مكتسب.... واجب عليا ولازم أعمله ولو غيبت عنه مره أو نسيته أبقي أجرمت فى حقهم ويزعلوا وأضطر أصالح وأحايل من غير حتى والله ما أبقي فاهمه تماما يعنى انا بصالح ليه..... بس اتعودت فى المواقف دى اسمع جمله" أصلهم كانوا مستنين منك تعملى كذا زى ما اتعودتى تعملى"

وتيجى الصدمه بقي لما يحصل موقف منهم صغير أو كبير وانا ازعل...... وهنا تتفتح عليا أبواب جهنم وأسمع صوت جاى من جواهم بيقول "هى دى كمان بتزعل؟؟"

ويتعاملوا معايا بمنطق غريب اللى هو ايه العبط ده انتى ازاى تزعلى و ابقي محتاجه أفهمهم وابررلهم واشرح انا زعلى من ايه وليه وهيخلص امتى

والاصعب انى فى لحظه بأمر من أحدهم ابقي مش زعلانه واعدى الموقف عشان انا عقلى كبير وهما مضغوطين وحياتهم صعبه

وأفضل اضغط على نفسي عشان الكل صحاب وعيلة وبيت ومسئوليات ومشاوير وحوارات ومناسبات واجتماعيات

اضغط على اعصابى عشان اقدر اقف جنبهم تانى واسمعهم واسندهم ولما يعملوا اى حاجه انا ممكن افتكر انها تزعلنى مثلا لازم اقلب لوح تلج ومزعلش واعديها

اضغط على نفسيتى عشان ميضايقوش وميزعلوش لما يلاقونى ساكته ولا قافله موبايلى ولا مش حابه اخرج ولا مش حابه اشوف بشر مثلا

انا روحى تعبت من كل ده

وانا مش هاسند حد تانى غير لما ابقي كويسه.... ومش هاصالح حد غير لماابقي انا مش زعلانه الاول..... ومش هاجى على نفسي وانبساطى عشان اى ظروف عند اى حد غير نفسي..... وهاخد قرارات لوحدى بتقديراتى انا ومراعاة لظروفى أنا وبس مش أى حد تانى

عشان انا فعلا بعد ١٠ سنين من وجهة نظرى أنا مطحونه كصاحبه واخت وزوجه فأنا اسفه لنفسي وبس انى سمحت لحد يشوفها صاحبة فاشله او اخت انانيه او زوجة مقصره بعد كل المجهود البدنى والنفسي والعصبى اللى انا ببذله ده

[beetgdid]

هو أنا أكيد مش الكائن الصغنن اللى شعره اصفر وقمر ده

ولا أخويا بردو السكر اللى شايل القمر ده خالص

بس الصورة دى أكتر صورة معبرة عن حالى أنا وهو أخر ١٠ سنيين

هو حرفيا شايلنى.... مش بس شايلنى أنا... ده أنا ومشاكلى وجنانى ونرفزتى وطرقعتى وقراراتى وتصرفاتى وغباواتى وكله كله كله

والغريب فى الموضوع ان عمره ما اشتكى ولا عمره حسسنى انى تقيله عليه.... بالعكس شايل كل ده من قلبه ومهتم وفارقه معاه لاخر لحظه

وانا بقي متوصاش زى البنوته اللى فى الصورة بالظبط نايمه على كتفه وراميه حمول الدنيا كلها عليه وسانده ومريحه بزياده عشان عارفه كويس اوى ان الكتف اللى سندها ١٠ سنيين عمره ما هيخذلها ابدا

الأخ اللى أختارها وأختار يشيلها كده بكل قرفها ١٠ سنين مش هيبعها ويسبها تقع على جدور رقبتها

الفكره ان البنوته الصغنونه دى كل ما حملها بيتقل على اخوها بتحبه اكتر وتقربله اكتر وتبقي مش خايفه ابدا ان الدنيا تيجى عليها عشان متاكده ان دراعاته مفتوحالها طول الوقت ولو نسمه هوا فكرت تأذيها هتجرى على حضن أخوها

الحمد لله على نعمة وجود أخويا الكبير ❤️

[beetgdid]

المكان ده مريح لدرجة غريبة  فكرة انى اجى هنا فى حد ذاتها مريحة  مكان هادى جدا ومليان بس بمشاعر حلوه او وحشة مش مهم  الاهم فيها انها صادقه  مكان خصوصى ليا ولروحى لا برمى فيه كلمة حد ولا ببعت رسالة مقصودة  الكلام هنا بيطلع يترمى فى الهوا يريح القلب من غير ما يوجع الدماغ  الكلام هنا فعلا لوجه الله  انا فكرة تمبلر بتريحنى لدرجة العشق  مجرد انى افتحه واشوف كم الناس اللى بتبعت رسايل مجهولة من غير عناوين بحس انى مش لوحدى  لسه فيه ناس بتحس وتحب حاجات مستخبيه وعندها كلام كتير صعب يتقال لبشر عارفينهم فبنتجمع كلنا هنا ونرميهم فى الفضا وتفرح اوى لما تلاقى حد عجبه الكلام وعاده وراك  بتحس هنا اكتر انك مش لوحدك فى احساسك وان فيه ناس مشاركاك  يمكن متعرفش هما مين ومتبقاش عاوز تعرف المهم بالنسبالك انك مش لوحدك :)  شكرا تمبلر على الصحبة الحلوة 

[beetgdid]

وبعد انقطاع سنة واكتر عن المكان والبيت الجديد  نرجع ونقول الاهم دايما انك تكون سعيد :) مهما طال الليل جاى بعده نهار 

[beetgdid]

كان نفسي يبقى عندى شخص تانى اقدر اعمل ده كله معاه

[beetgdid]

هو انتوا ازاى طلعتوا بالوحاشه دى وانا ازاى طلعت بالغباء ده ؟؟

[beetgdid]

تعرف ايه انت عن الوجع تعرف ايه عن الخذلان تعرف ايه عن الكسر طب تعرف حاجه عن القهر تعرف ايه اصلا عن المشاعر والاحساس عمرك جربت تشوف الدنيا بعيون تانيه عندها ذره احساس عمرك فكرت تقدر احساس عند حد حتى لو مش عندك طب عمرك حتى فكرت فى كلامك قبل ما يوجع عمرك حد جه يتكلم معاك وعرفت تحتويه عمرك جربت توصل لحد بطريقته هو طب عمرك حسيت ؟؟؟ واضح ان فى زمانا الاحساس بقى ابتلاء واللى ربنا نزع منه الاحساس يبقى انعم عليه عشان بقى قادر يعيش فى دنيا جاحده من غير ما يحس بحاجه ولا بحد

[beetgdid]

“ هناك شخص في داخلي يريد أن يحكي و يحكي و يحكي .. هناك شخص آخر يريدني أن أسكت .. أن أسكت أبديًا و ألّا أفتح فمي مرة أخرى ” - ربيع جابر -

(via md-hamdy)

[beetgdid]

[beetgdid]

يا بخته اللى ليه صاحب يسنده.... ولو خاف من كل الناس ميخفش منه.... ويحكيله وكانه قدام المرايه... ويعمل كل حاجه عشانه ويستقوى بيه على كل حاجه  يا بخت اللى هدية الدنيا ليه كانت اخ مش من دمه 

[beetgdid]

لو فقدت الأمل يبقى ملهاش لزوم تقرا  أما بقى لو لسه باقى عندك شوية نور بيقولولك ان اللى جاى ممكن يبقى حلو فكمل قرايه  ولو لسه باقى جواك طاقة انك تتحرك وتقلب موازين دنيتك فيبقى ركز فى الكلمتين دول  الدنيا مفيهاش حاجات ببلاش و كل لحظه رضا وسعادة عشان تنولها لازم تجرى كتير وتتعب كتير  الدنيا عامله زى السينما والتمثيل عشان يطلع المشهد حلو اوى محتاج تعب  وفى الاغلب المشهد اللى بنشوفه عمره دقيقتين احتاج تحضير وتجهيز واتنفذ فى ايام  عشان كده لازم يبقى عندك طاقة تتعب كتير عشان تعيش لحظة سعادة حقيقية  قادر نكمل !! ناوى يعنى تتعب !! لو كان ردك اه يبقى يلا بينا نكمل  فى الاول كده هتحتاج تقف انت ونفسك قبل اى شخص تانى وتسالها “ هى الحكاية مستاهله” الدنيا اصلا مستاهله انك تحلم فيها بلحظه سعاده  لو كان ردك على السؤال الاولانى اه يبقى طبيعى يبقى ردك على ده يكون اه مستاهله  مستاهله عشان هنعيشها مره واحده وبس ومعندناش فرصة تانيه  وده بالنسبة للدنيا  اما بقى ناس الدنيا فدول لازم نقف قدامهم كتير اولا بنحبهم ؟؟ هما يستاهلوا الحب ده ؟ طب يستاهلوا اشخاص زينا ؟؟ طب يستاهلوا نعمل عشانهم حاجه ؟؟ وللامانه يعنى كل الردود على الاسئله دى مش مهمه عشان حتى لو كانت كل الاجابات لا فالسؤال الاهم هنا: احنا عاوزينهم ؟؟ السؤال ده هو المهم فكل اللى فات عشان لازم نبقى مقتنعين من جوانا ان احنا الاهم احنا بنحب الناس وبنعيش معاهم عشان نفسنا قبل اى حد تانى بنحبهم عشان بيخلونا مبسوطين ومرتاحين واحنا معاهم طب لو بعد فتره الانبساط والراحه اللى عندنا دول اتغيروا او قلوا او مبقوش موجودين لاى سبب لازم نقف تانى مع نفسنا ونسال السؤال المهم : احنا عاوزينهم ؟؟ لو الاجابة اه يبقى قدامنا حل واحد وبس المعافره هنعافر عشان يبقوا ناس بتبسطنا وتريحنا تانى مش هنيجى على نفسنا لحظه لانك لو جيت على نفسك بسبب شخص هتكرهه هنعبر عن حبنا وقت ما نبقى عاوزين ونقدر الحاجات اللى فرقت معانا وبس و نطلب اللى نفسنا فيه ونقول لا وقت ما نحب نعترض عادى جدا ومنجيش على نفسنا فى الوقت الحالى خالص الا فى حاجه واحده اننا بنعافر نفتح بيبان الصمت وقت ما تتقفل فى وشنا ونتكلم ونطلع كل اللى جوانا ونطلب اللى نفسنا فيه ونوصل لحلول جديده مجربنهاش قبل كده ولو متغيرش حاجه نطلب من اول وجديد ونفضل نعافر ونعافر ونتكلم ونتناقش مرة واتنين وتلاته وعشره ومنستناش الطرف التانى يبدأ طالما لسه عندنا أمل نجرب طريقة واتنين وتلاته لو زهقت يبقى ملهاش اى تلاتين لازمه العيشه وساعتها لو قررت تكمل هتبقى من غير روح موضوع الأمل ده للاسف بيخلص فى النهاية على حلين افقد الامل وفارق او خلى عندك امل وعافر اختار الحل اللى يريحك من غير اى اعتبارات لاى حاجه تانيه فى الدنيا غيرك انت وراحتك      

[beetgdid]

انا بحبك على فكره وعندى اعتقاد انك مبقتش فاهم يعنى ايه بحبك انا لما حبيتك من اربع سنين او اكتر شويه مكنش اقصى طموحاتى اننا نتجوز مكنتش بحبك عشان اخد لقب مراتك وتنتهى الحكايه دانا كنت ببدأها :-) كنت بحبك عشان اعيش جنبك دنيا محدش عاشها غيرنا كنت بحبك عشان الاقيك طول عمرى جنبى كنت بحبك عشان تفضل طول العمر فاهمنى و عارف كل حاجه جوايا انا اول سبب خلانى احبك انك صاحبى انك القريب... بتاع المفاجات.... وانزلى يلا انا تحت شغلك .... وتليفون تسعه الصبح.... و هخرج بكره تاكلى رز بلبن حبيتك عشان جمالى اللى كنت بشوفه فى عنيك عمرى ما هنسي ان اول مره قلبى مال ليك كان بسبب انك انت بنفسك فتحتلى باب العربيه وقلتلى النهارده دلع بس انا بكتب كل ده دلوقتى عشان اقولك انى عاوزه اكمل مش عاوزه نهاية الحب تبقى الجواز احنا الشهر الجاى عمر جوازنا هيبقى سنتين كانوا صعبين اوى أنا عارفه وانت عارف بس الخبر الحلو اننا عدينا الصعب وبقينا حته واحده ... قادرين نوصل لبعض ونقدر بعض وناخد بايدين بعض بس انا لسه معشتش معاك اللى نفسي فيه لسه محققتش كل طلباتى اللى طلبتها فى "مين" انا عارفه انك بقيت جوزى بس انا وحشنى حبيبى ينفع نعيش من جديد !! احبك من الاول وتحبنى تانى من الاول ينفع ارجع اسمع منك كلمه حلوه !! ينفع ارجع افرح بكل خطوه جنبك ينفع نرجع ناكل رز بلبن ينفع نشرب بطيخ ينفع تاخدنى النادى فى الزمالك على النيل وتسمع كل الكلام العبيط ينفع ننزل نلف بالعربيه ينفع اكلمك وانا منهاره فتهدينى ينفع نغنى تانى فى التليفون ينفع ترجع تهتم بشكلك اوى لما نبقى نازلين ينفع نتغدى انا وانت فى البدرى يوم وتروحنى على ماما وتكلمنى بليل فى التليفون تقولى ده يوم من زمان ينفع تضحنى اوى تانى فى التليفون طب ينفع تسيبنى احبك زى الاول واكتبلك جوابات و اسمع صوتك قبل النوم وتنام على صوتى وارغى وانت نايم ينفع تفتكر كل اللى كان بيبسطنى ينفع فى وسط الزحمه تبعتلى اغنيه او مسج حلوه ارجع بيها احساس الفراشات ينفع تجبلى سلسله صغيره تانى لما اتضايق ينفع اوحشك ينفع لما اطلب اسافر لوحدى متقوليش لا مينفعش وتقولى لا كتيير هتوحشينى ينفع تقولى براحه وبصراحه على اللى مضايقك ينفع تقولى اسبوع عيد ميلادك طلباتك اوامر ينفع تقف جنبى وانا بعملك اكل طب تساعدنى وتشاجعنى اعمل دايت ينفع تفتكر انى باكل لما ببقى زهقانه ومتضايقه ومباكلش وانا مبسوطه ينفع متقطعش صلاتك بيا إمام ينفع انام على صوتك بتقرا قران طب ينفع تحضنى من غير ما اطلب ينفع تحضرلى اكل من ايدك او حتى عصير من غير ما اكون عيانه ينفع تمسك ايدى طول ما احنا بره البيت ينفع نتصور كتير انا وانت بس ينفع مره تعملى اللى بحبه من غير ما تفكرنى بعدها انك جيت على نفسك ينفع ترجع البيت جايبلى الوان او خيوط او حاجه غير روتين الشكولاته ينفع تاخدنى من ايدى تودينى لهبه وتقولى اتبسطى وبس ينفع تفاجأنى بحفلة لعمر خيرت طب سينما بليل انا وانت بس طب مفاجأه مجنونة لعيد ميلادى طب اخطفنى ونسافر من غير ما اعرف رايحين فين انا عارفه انى رغيت كتير وكمان عارفه انك احتمال لو قريت كل ده متهتمش ��س انا لحد دلوقتى معرفش انت هتقراه ولا لا انا كنت عاوزه اقولك وافكرك وافكر نفسى بانى حلمت معاك بدنيا غيير و لسه نفسي اعيشها جنبك نفسي افرح جنبك نفسي محتاجش لغيرك نفسي قلبى يرفرف تانى بسببك نفسي ارجع اسمع اغانى حلوه و اروح بدماغى ليك نفسي اشوفك احسن حد فى الكون نفسي أءفور معاك انت واضحك بصوت عالى جنبك انت واحضنك وارقص واعيش عمرى راضيه بيك نفسي تفهم ده اوووى انا عارفه انه مجهود اننا نعمل كل ده وقصاد كل ده انا كمان عليا واجب هيتعمل بس طالبة منك البداية تعالى نجرب حتى لو شهر نرجع كل الحلو اللى راح مننا مش يمكن ارجع حلوه تانيه مش يمكن ارجع فاهماك ومريحاك زى قبل جوازنا مش يمكن ارجع للبس اللى انت بتحبه مش يمكن اصالح نفسي تانى مش يمكن ابقى احلى فى عنيك انا محتاجه مساعدتك اوى ومحتاجاك تفهمنى وتبقى جنبى عشان نكسر الروتين ونحب بعض تانى اكتر واكتر ونتفاهم اكتر ونقرب ارواحنا لبعض يا ترى هتقبل نرجع ؟؟

[beetgdid]

زمان..... وحلاوة زمان عيشنا ايام كتير حلوه وصعبه وبعد وقت اكتشفنا اننا كبرنا وقدرنا قيمة كل حاجه زمان الحلو والصعب كان ليهم قيمه ودلوقتى بيوحشنا الصعب قبل حلو قلبنا بيرفرف مع كل حته مزيكا تفكرنا بزمان زمان ده مش بعيد... ده من كام سنه بس سنين حلوه كنا فيها عيال وهمومنا هموم عيال

[beetgdid]

Fionka is here :)  تالية <3 وصلت تالية ومعرفش ليه انا مش خالة خالص المرة دى  تالية حصل معاها حاجات لاول مره  تالية وقفت استنتها على الباب وانا قلبى بيدق بشكل مش طبيعى  شفتها اول واحده بعد مامتها وباباها  شيلتها على ايدى فى اول ساعه بعد ولادتها  اول ما شفت وشها عيطت بشكل عمرى ما كنت اتخيله  تانى يوم لما حضنتها محستش ابدا انى خاله.... دى بنتى  حته منى بصالى... انا متاكده انها لسه مش شايفانى بس حسيتها بصالى  قلتها لهبه بهزار وكنت قاصداها اوى “ فيونكة بتبصلى طالعه بتحبنى من اول يوم” حسيتها بجد  كنت رايحالها وانا فيا هموم الدنيا و موجوعه فوق ما حد يتخيل  دوبت كل ده وطول مانا جنبها مش شايفه غيرها ومش حاسه غيرها... ومش عاوزه ارفع عينى من عليها  انا بقالى كتير لسانى تقيل عن الدعا وقلبى جامد على حاجات كتير  يوم ما جيتى دوبتى حاجات كتير يا ارق واطهر ما شافت عينى  اول دعوه بعد عصيان طويل للقلب كانت ليكى ووانا حضناكى  انا عارفه ان مامتك كانت موصيانى اول ما اشوفك ادعى ربنا يرزقنى  وانا نفذت الوصية بس حرفتها شويه ودعيت ربنا انى اجبلك صاحبة واخت تفضل جنبك عمرك كله  وتانى دعوة لما فرحت بيكى فى حضن ماما هبه... قولت يارب يا هبه تشوفينى وانا بين ايديا بنتى كده وتحسى نفس اللى انا حاساه دلوقتى  انت يا تالية بنتى لانك بنت الغاليه اللى مهما حكيت عنها مش هعرف اوصفها ولا اعرف اوصف غلاوتها  انتى حته من الجنه  انتى جاية من حته طيبه ورايقه وصافيه وحنينه وقريبه  ربنا يحفظك وتفضلى راحه وفرحه لكل اللى حواليكى  ربنا ما يبعدنى عنك ابدا وافرح بيكى كل يوم  ربنا يرزقنى القرب منك دايما وميحرمنيش انى اضمك وارتاح بريحتك ابدا  ربنا يبارك فيكى ويبارك فى حياتك ويرزقك كل الخير والفرح والسعاده والهنا فى الدنيا  ربنا يحلى ايامك يا بنتى وتعيشى وتكبرى وتفرحى  ربنا يرزقك قلب زى قلب ماما ويفرحها بيكى وما يحرمها ابدا من البصه فى وشك وحضنك  ربنا يرزق بابا برزق واسع ومتحتاجيش لحاجه ولا لحد ابدا طول ماهو موجود ربنا يرزقنى حبك ��ميحرمنيش من وجودك انتى وماما ابدا  نورتى دنيتنا يا حتة من الجنه ريحت القلب كتيييييييييير 

[beetgdid]

أملى فيك ياربى كبير وظنى بيك يا حبيبى جميل

[beetgdid]

ف عز البرد ده نفسي اخد دش سخن جدا والبس لبس ريحته حلوه ورايقه وامسك مج الكاكاو فى ايدى وانزل تحت البطانيه واتفرج على فيلم او مسرحيه دافيه وتيجى انت تاخدنى فى حضنك واروح فى النوم

[beetgdid]

بحبك وانت عارف تفرحنى :-) Choco choco chocolla