#شنتة | Explore Tumblr posts and blogs

hala-abdulaziz · 4 years ago

Text

حاسة حالي عايشة بكابوس مبارح، كونّا قاعدين بالبيت لكن كل واحد فينا ماسك تليفونو بيراقب الأخبار

إزا جيش الاحتلال حيفوت برّي، ولا رح يقصفوا البيوت عشوائي و زي م تيجي تيجي، ولا رح يطلعونا من بيوتنا عشان يقصفوها زي م صار بالشجاعية بحرب ال2014 ..

حرفياً حالة من ��لشلل والعجز وقلة الحيلة، كانت ماما بتتناقش مع أختي إنو كيف ناخد شنتة زغيرة نحط بقلبها أوراقنا المهمة و أواعي وأشياء ضرورية في حال تركنا البيت .. وأنا كنت بسمع نقاشهم ومش عارفة شو أحكي..

بعد بشوي بلشت تطلع أخبار إنو الجيش الخرا حيفوت بري و عم بيجهزوا حالهم يجتاحوا غزة ، ماما سمعت الخبر و صارت تبكي المسكينة .. حاولت ألطف الجو قلتلها شو بدهم بأشكالنا !

منطقتنا رايقة و لو بدهم يقصفوها ما بتاخد منهم عشر دقايق ف مارح يعزبوا حالهم ويفوتوا .. وأصلاً هدول مافي أجبن منهم ..

من جواتي كنت مرعوبة، وحرفيا مش قادرة أصلب طولي ولا قلبي مسعفني إنو أكمل حكي .. كنت حاسة الموت قريب .. قريب كتير كتير .. بينا و بينو بس شعرة.

بطلت عارفة ع مين أتطمن، أحكي مع خواتي ولا مع صحابي ولا أواسي أهلي بالبيت ولا أضل ساكتة وأتابع بدون تعليق ولا شو!

أنا حتى مش قادرة أكتب ولا قادرة أمسك تليفوني وأرد ع أيا شي بيوصلني .. الشي اللي بيجبرني إنو بحس من واجبي أطمن اللي بيسألوا عشان هم مش ناقصهم رعبة و خوف.

إحنا هون بنقابل الموت مليون مرة باليوم وإزا هلأ الله لطف فينا و ضلينا عايشين ممكن كمان شوي نكون تحت الركام، تعب الناس و شقا عمرها و ذكرياتها و أرواح الغاليين عليهم كل شي راح وعم بيروح .. ما ضللهم شي يخافوا عليه ولا ضللهم شي يتمسكوا فيه ..

إحنا خايفين لكن مجبورين نتمسك بكرامتنا ع الأقل لأنو شعب زينا هيك ميت و هيك ميت ف لما يختار يموت خليه يموت و راسو مرفوعه .. مضحي مش مجوبن وخايف ..

إحنا خايفين .. خايفين و بنخاف و رح نخاف لكن ما عنا سبيل تاني غير مقاومتنا و غير عون الله ..

#savesheikhjarrah #palestine #gazaunderattack

25 notes · View notes

warda1994 · 4 years ago

Text

ناطر بعتم الليل و ناطر

حبيبيك ناطر عبابك ناطر

نرحل سوا بهالليل نسافر

ع الغيم نسافر بالحلم نسافر

انا الشط اللي ضايع

انا البحر الغريق

لائيني يا حياتي بهالطريق

ناطر بعتم الليل و ناطر

حبيبيك ناطر عبابك ناطر

نرحل سوا بهالليل نسافر

ع الغيم نسافر بالحلم نسافر

وائف انا ع طراف الغابة

حامل رحيلي و شنتة غيابي

24 notes · View notes

yasser01996 · 4 years ago

Text

هي أول مرة بشيل شنتة بنت مالا أمي ومابخجل

هي أول مرة بهوّي لشخص...وبكون مبسوط من قلبي ومالي حاسس بالعيب

أول مرة بضحك من قلبي على شيء تحقق معي وأنا مو متوقعو...بس متمنيه

أول مرة بغرف قلبي لما حدا بحكيلي ع حديثو قدام أهلو ورفقاتو...وبشوف قديش أنا حلو بعيونو

هي المرة المليون...الي بقول هالشخص وصل لمرحلة ماوصلها حدا قبلو برد بتفاجئ انو وصل لمرحلة أقرب من الي قبلها....صدق من قسم الحب درجات

هي أول مرة بصير معي كل هالأشياء بيوم ومع شخص واحد 💙

٢٦/٧/٢٠٢٠

1 note · View note

lost-chances889 · 5 years ago

Text

رقم ١٠

مرحبا كيفك ... الي مدة طويلة مكتبتش ، اسف كنت مشغول و سارح في الحياة ، لفيت و سافرت عشان شغل ، قعدت تسع شهور برا انفصلت فيها عن كلشي بذكرني بالبلد و شو فيها ، لما قررت اطلع مخذتش معي الا بس اواعي و شنتة خربانة ، غريب كيف انه كل الروتين و الحياة الي بنكون بانينها حوالينا ممكن تتغير بلحظة ، و نكتشف انه كل الشغلات الي محتفظين فيها ككتب او افلام او مقتنيات ملهاش اي قيمة مقابل مغامرة جديدة نحو المجهول ! او نحو مكان جديد ، استأجرت شقة سكنت مع ناس رحنا شرينا اثاث و كنا راح نصرف كثير ، بعدين اتذكرنا انه احنا مش قاعدين للابد ففش داعي نشتري اشي اله قيمة ، كنباي قديمة على فرشتين و على اكمن صحن و ادوات مطبخ و كان وضعنا لوز ، و استخدمنا اسلوب الخزانات المفتوحة للاواعي ، بوكسات بحط فيها اواعي و علاقة اواعي بعلق عليها بناطيلي و قمصاني بدل خزانة ، ممكن تلاقي نفس الاشي بايكيا و صراحة كثير رهيب و مريح و مرتب ، المهم طلعت بقدر اسكن مع ناس و اتفاهم معهم على عكس اعتقادي و اعتقاد امي و اني مبنفعش اتفاهم مع حد ... صرخت كثير بالشغل ! بهدلت ناس كثير ، و انتقمت من اخو المنيوكة الي كان بحاول يخرب علي شغلي و حتى هو نفسه بعد ما وقع بنفس جورة الوساخة الي كان يحفرها للكل اكتشف انه كل تعبه و وساخته كانت على الفاضي لانه الوسخ الكبير مش فارق معاه حد ، بعدين بحكيلك عن الوسخ الكبير ... المهم خلصت تسع شهور برى و بعدين رجعت على البلد ، شفت كل الناس الي كنت مشتاقلهم ، و شفت كل الناس الي كنت بشتغل معهم و كلعادة بلشو يشكو من الشغل قديش صعب و انه مفيش شغل .. و بلشت ارجع اتعلم كيف اعيش مع عيلة ببيت و ارجع اتعلم انه العيلة مفيش بينها حدود استحاء او كياسة ، مثلا عادي واحد من اخوانك يفوت يخري بالحمام و يسيبو وسخ .. او مثلا واحد ينزل يطبخ اشي و يسيب الجلي من غير غسيل ... الغريب انه لما كنت ساكن مع ناس كان خلص في قواعد متفق عليها من غير كلام عن النظافة و غيره .. ممكن لازم الواحد بحياته بعد سن معين انه يترك عش اهله و يروح يسكن مع ناس غرب عشان يتعلم عن الكياسة و النظافة ، حتى لو طلعو ناس خوات شرموطة و خرا برضو بقدر يتعلم منهم ، من ناحية اتعرف على بنت او علاقة حب برضو مزبطش اشي .. او ممكن كان في اشي يزبط بس قد ما حاولت اقنع نفسي افكر فيها كبنت لعلاقة غرامية مكنتش اقتنع ، لاسباب عديدة اغلبها من ناحية شخصيتها ، المهم لسبب ما بلاد برا مكتأبتش فيها الا بجوز بس مرتين ، اول ما وصلت و سكرت سكرة عنيفه بحفلة ، فجأة و احنا بنرقص و الكل مبسوط حسيت بحزن شديد و صار نفسي اموت يمكن بسبب خرا البلاد الاجى معي ... و ثاني مرة بعدها باسبوع كنت سكران كثير و انبعص كيفي و قررت اروح بس وصلت الدار تمام ، احلا اشي هناك بهذيك البلاد بتكون معمي ملوش حد فيك ، و سواق التكسي بوصلك من غير ما يفتح حلقه من بعديها صارت كل الحفلات انبساط ... المهم تعلمت شغلات كمان ، انه لازم اخفف اهتمام بمشاكل غيري ، لانه الناس جد راح تستغل قديش انت طيب و لما تصير معك مشكلة ولا راح تلاقي حد منهم ، و ثاني اشي تعلمته اني لازم افتحلي مشروع اترزق منه ، مطعم او كافي او دكان او حتى بسطة ، و ثالث اشي اتعلمته انه اذ بدي اعطي لازم اكون متاكد اني راح اوخذ بنفس القدر ،و طبعا هاي القاعدة لا تنطبق اذ كنت حاب اساعد حد ، اخر اشي بدي احكيلك عنه البحر ! البحر يااااااااااه البحر ، بتكوني متذايقه او زعلانة و بتروحي بتقعدي على الشط او بتركبي العبارة و فجأة كل الطاقة السلبية فيكي بتبلش تطلع و تغرق بلبحر بين موجه ! قد ما بتسرحي بالبحر مستحيل تملي و مستحيل مخك يوقف تفكير ، يا ريت عنا بحر ... كان حياتنا احلا بكثير ... حتا قرفنا كان رح يكون احلا بكثير ...

#رسالة #بحر #موج #قرف #خرا #سكر #سفر #الى من يهمه الامر #كيفك

5 notes · View notes

sham-blog · 5 years ago

Text

انا لما بشرح لشرطي السير ليش شهادة السواقة مو معي

لاتعطيني مخالفة الله يوفقك ...يعني مصروفي والله يادوب

ناطرة زيادة بس اهلي مابدن قال عم اصرفن بشغلات فاضية

كنت معصبة فلبست كندرة غير الكندرة تبع امبارح

لهيك اضطريت احمل شنتة غير الشنتة تبع امبارح

والشهادة نسيتها بهديك الشنتة و ......

الشرطي: اي وبعدين

7 notes · View notes

so2al · 6 years ago

Text

وأنا سنة أولى كان نفسي أحب !

ممكن زيي زي أي حدا ثاني ..

بس مع ذلك كنت حريص إنه هالكلمة ما تطلع مني لأي حد ..وكان عندي قناعة إنه بعد الاعتراف الأول بالحب ، راح تفقد كلمة "بحبك" قيمتها !

عشان هيك لازم أحافظ على شرف هالكلمة ، واللي انخلقت لتنحكى مرة وحدة بس !

طبعا إمي وأبوي حسوا عليّ ، ممكن لانه كنت كثير مهتم أزبط حالي وأنا طالع عالجامعة ، فضلا إنه كل يوم بجننهم إنه بدي سيارة .. كيف ليش بعرفش ؟!

بذكر وقتها قعدوا معي قعدة مطولة ، كانت من المرات النادرة اللي بتفقوا فيها على اشي بحياتهم !

اتفقوا إنه دير بالك وشكلها الجامعة راح تغيرك ، وترى اللي بتعمله في بنات الناس رح ينعمل في اختك :/ !

طبعا الحمد لله بعد أكم شهر اختي اتزوجت .. وزي كأنه همّ كبير وراح عني .. مش قصدي عن اختي ..قصدي عن تأنيب الضمير اللي راح احس فيه في حال حبيت ..

وقتها امي وابوي طلعولي بقصة ترى اللي بتعمله بالناس بصير في بناتك !

ييييييي انا ويني ووين بناتي هسا .. ههههه

واصلا فكرت فيها منطقيا .. انه ربنا اعدل واكرم انه يجازي حدا ما اله دخل بذنب وغلط حدا تاني .. واصلا طلع في اية في القرآن : ولا تزر وازرة وزر اخرى ..

شخصيتي الحلوة كانت كفيلة إنه أتعرف على عدد لا بأس به من البنات ، أظن إنه عدد ممتاز كطالب سنة أولى لسه .. ولا أخفيكم سرّا إنه كل ما اتعرف على بنات اكتر كل ما ازدادت صعوبة كلمة بحبك !

كنت على شفا حفرة إنه اخوض قصة حب ، لكن كنت أدارك نفسي في اللحظات الأخيرة !

وما اخفيكم كمان مرة ��نه كل ما شعرت إنه في بنت بتتودد إللي وبتلمح لقصة حب كنت أنفر منها ! وما اعتقد إنه صادفت بنت صاحبة إرادة قوية من اللي كنت بعرفهم !

كنت عارف إنه كلامي مع البنات غلط .. وإنه الاختلاط بهذا الشكل حرام .. بس بنفس الوقت تعال إحكيلي إنه اللي بتعمله غلط وحرام .. وقتها راح اطلعلك متخلف ورجعي ومعقد ومريض .. !

بمرور سنة تقريبا ..

دخْلت عالمحاضرة .. كانت لابسة جلباب كحلي وحجاب أبيض ومعاصم بيض .. وكانت لابسة شنتة لونها خمري وعليها دبوس لفريق بتشتغل معه كمتطوعة .. وكانت حاملة بإيدها كتاب حاولت أعرف شو اسمه ما قدرت !

كانت عادية كشكل .. يعني معظم البنات اللي بعرفهم أحلى منها.. ممكن وقتها خطر في بالي عبارة لدستوفيسكي : ليس المهم جمال الوجه .. بل البراءة هي الأهم !

اه اه كانت بريئة .. بريئة جدا ..

لفتت انتباهي بشكل كبير .. مش شوي ..

بعد ما الدكتور اخذ حضور وغياب غيرت مكاني وقعدت ورا .. حتى اراقبها !

كانت خجولة كثير .. وعلاقتها محدودة جدا .. كانت تسلم عصاحبتها شوية .. بعدين تفتح للكتاب اللي معها عبين ما يدخل الدكتور .. ما عمرها شاركت من حالها ..بس لما كان الدكتور يسألها كان يضل يطلب منها تعلي صوتها .. !

ما بعرف ليه هالبنت لفتت انتباهي كثير !

كنت لما أشوفها اضب سيجارتي مباشرة .. وما كنت أحب تشوفني وانا قاعد مع بنات ..

كنت أحسبلها حساب أكثر من أبوي ..

مرة خطرلي أوقفها وبس احكيلها عفكرة انا صح بدخن وبحكي مع بنات ..

بس والله بحب الله والرسول والقرآن والاسلام .. واصلا مش في حدا كان سكران زمن النبي ولما واحد من الصحابة لعنه ..النبي عصب وحكاله لا تلعنه لانه بحب الله والرسول !

انا بعرف انها بتعرف هالحديث .. بس كنت حاب اذكرها فيه ..

بس سؤال ..طيب ليه انا حاب ابرر الها إنه انا حد منيح .. وليه بحسبلها كل هالحساب !

واصلا هي مش شايفيتي من أصلي .. ..

بس مع ذلك لازم اعمل اشي يبين إلها اني حدا منيح .. لازم !

خطر في بالي احط جنب اسمي عالفيس بوك اشي اسلامي .. مثلا الواثق بنصر الله .. مسلم وافتخر .. الله أكبر .. اشي زي هيك ..

حاولت ادور على اسم الصحابي السكران .. بس خفت تفكرني واصل لدرجة الشرب !

واصلا هالصحابي مش معروف ، يعني هي بحالها ممكن ما تعرفه ..

يا الله .. كيف بدي افرجيها إني حدا منيح .. كيف كيف ؟؟

اه .. خليني انزل بوست عجروب الدفعة ..ويكون عنوانه نصيحة الى اختي الطالبة !

كوني معتزة في دينك ..شامخة بفكرك ..إياك ان تكوني أسيرة للشهوات و الشبهات .. و��ياك ان تكوني كتلك الفتاة الساذجة .. والتي تتجول في باحات الجامعة والسكوير ..تبحث عن شاب جذاب أو عاشق كذاب !!

بس للاسف ما حطتلي لايك !

===

مرة بفترة الإمتحانات لمحتها في المكتبة بتدرس .. وهي قاعدة عالطاولة أجو شبين قعدوا على نفس الطاولة ..وكان عنفس الطاولة بنات غيرها ..

حسيت إنها انزعجت بس ما كان مبين عليها وعفكرة الموقف جدا عادي بس هي حدا غريب في هيك اشياء ... وحتى ما يبين عليها مسكت تلفونها وقامت على أساس تحكي تلفون ، أنا كنت مراقبها منيح .. طلعت عباب القاعة وزي ما توقعت ، ما حكت تلفون !

بعدها دخلت وحملت اغراضها عأساس إنه خلص بدها تطلع ، وحتى ما يبين عليها إنه قامت عشان الشباب !

مرت فصول .. وانا لساتني مش عارف ليه هالبنت لافتة انتباهي وإني حريص تفهم إني حدا منيح حتى لو عندي أغلاط !

سجلت مع عمرة الجامعة .. وشباب المصلى استغربوا إنه راح اسجل في العمرة .. لانه دايما بشوفوني مع بنات .. ولانه كمان بدخن ..

بس بصراحة ما كانوا فارقين عندي احكيلهم اني حدا منيح ..ولا اشرحلهم قصة السكران !

واحنا في طريقنا للمدينة المنورة ، كانت الدنيا ليل وأغلب الباص نايم .. ما بعرف ليه لقيت حالي بفكر فيها .. وبنفس الوقت بحاول أجاوب على السؤال المعهود .. ليه هالبنت بالذات من دون غيرها ؟؟!!

ما بعرف .. بس كانت مسافة الطريق كفيلة إنه أجاوب على جزء من السؤال ...

اكتشفت إنه سبب تعلقي بالبنت دينها وحشمتها ولبسها وادبها وحياءها وعلاقتها مع ربنا !

كنت اشوف فيها الاشي الناقص من عندي ..

كنت اشوف فيها العلاقة اللي نفسي تكون بيني وبين الله ..

كنت اشوف فيها البراءة اللي ما صادفتها ولا ببنت تانية بعرفها !

كانت آخر سيجارة بدخنها في حياتي على آخر استراحة قبل ما نفوت المدينة ، بصراحة ما كنت متوقع إنها ممكن تكون الأخيرة ..

يا الله شو بكيت وأنا بسلم على سيدنا النبي صلى الله عليه وسلم ..

ما بعرف ليه وقتها تخيلت حالي قاعد بين إيده ، وبحكيله أنا صح مقصر يا رسول الله ، بس والله بفديك بروحي .. !

وانا متأكد إنه راح يبتسم وياخد بإيدي .. وراح يحط إيده عقلبي ويحكي : يا رب هالقلب ثبته على طاعتك وابعده عن معصيتك !

متأكد .. والله متأكد كثير كمان .. !

ممكن لحظة الصدق هديك كانت كفيلة إنه حياتي تتغير تماما ..

حكي مع بنات ..دخان .. شهوات .. حتى دراستي صارت أحسن ..

ولا أخفيكم للمرة الثالثة .. إنه سبب كبير بعد الله كانت هديك البنت واللي غيرت حياتي بدون ما تحكي معي ولا كلمة .. !

وأحكيلكم اشي ؟!

ولا مرة تجرأت ادعي إنها تكون من نصيبي .. بعرف إنه مش غلط أدعي ، وإنه الانسان لازم يدعي وهو موقن بالإجابة .. بس والله ما كان عندي الجرأة ..

كنت شايفها حدا بيني وبينه مسافات فلكية .. وإنه أكيد هي بتستاهل حدا أحسن مني ..

ما بعرف اذا كان تفكيري صح أو غلط ..

بس هذا اللي صار ..

اتخرجت .. وانقطعت اخبارها .. ولغت الفيسبوك تاعها !

وانا طلعلي شغل برا الاردن .. واتغربت ..

بس اتغربت فهمت حديث النبي صلى الله عليه وسلم لما قال فاظفر بذات الدين تربت يداك !!

خاصة إني كنت في دولة غربية ..

الي كان يصبرني في الغربة "هي" مع اني بعرف أنه يمكن ما اتكون نصيبي بس الموضوع بطل متعلق بشخصها بقدر ما كان متعلق في الصورة الي رسمتها جواتي !

السنتين مرو علي زي كأنهم عشرين سنة بس في النهاية خلصو ...

وانا في المطار بستنى الطيارة كان في بنوتة صغيرة يا الله شو أمورة حاولت استفزها عشان تيجي تحكي معي بس على الفاضي اضلها تضحك واتحط راسها في حضن امها وبتطلع بنص عين ههههه المهم في الاخر سألتها شو اسمك ؟!

حكتلي "مِسك" ..

مِسك؟! اتذكرت أنه اسم صاحبة مقربة من صاحباتها !

قلت خليني افتح الفيس بوك تاعها لعل وعسى أعرف أي خبر !

2 notes · View notes