dawshadreams

[dawshadreams]

باجي هنا وانا ف اقصى لحظات يأسي

المرادي قلبي بيتشال من مكانه

بابا حبيبي تعبان… حاولت بكل شكل لكن هو تعبان

بابا مش بس اب بابا ده صديقي الاول

قولوا ماشا الله عليه

انا كنت بعمل المصيبه واروح استخبى ف حضنه زمان

ولحد دلوقت هو الامان ليا من الدنيا

بابا دايما ساندني ف كل قرار اخدته

بابا عارف نوع الشوكولاته اللي بحبها ولما بزعل بيجيبهالي

بابا لما بيحب يضحكني بيجيبلي تفاح احمر

في يوم كنا في فرح وانا بعشق الفانتا تفاح احمر وانا صغيره وحد اخدها مني شدها وفضلت زعلانه اوي بابا يومها فضل يلف عليها للفجر لحد ما ج��بها

زمان مكانش البرقوق بينزل كتير البرقوق الاحمر الاحمر من جوه بابا كان بيقلب عليه السوق ويجيبه

من كام يوم لقيته نازل واتاخر بره وجابلي الكباب اللي بحبه انا اكتشفت انه الكباب مختلف لما هو بيجيبه واللحمه المشويه عشان فيهم فرحته

بابا هو اجمل حاجه حصلتلي في حياتي

وفي يوم بابا عنده جلطه في المخ اثرت على الادراك

انا خايفه… انا عمري ما خفت قد اللحظات دي

انا عاوزه بابا جمبي طول العمر عاوزه حصنه ضحكته ومناكفته ليا هزاره معايا وكلامنا على الافلام والاغاني وكل حاجه في الدنيا

ممكن تدعوا لبابا حبيبي؟ يخف وقلبه يرتاح ويرجع يضحك ويهزر ويعيش معانا زي الاول

[dawshadreams]

صحيت النهارده… او بمعنى ادق منمتش

عملت اسبريسو وساندوتش ولبست وهنزل

كل حاجه جوايا بتقول في حاجه غريبه

اول ما ركبت المترو لقيت بنت بتقرا النساء من الزهره والرجال من المريخ بالمناسبه ده كان من اسوا الكتب اللي قريتها وغالبا البنت لما تكبر شويه هتقول كده

شبه نايمه وشبه صاحيه ومتاخره عدت البياعه بتبيع عقد لولي … فضلت ابصله باستغراب بيفكرني بواحده صحبتي

فضلت اقول لنفسي ليه اليوم بادئ بذكريات مريبه

فضلت صوت يتردد جوايا انا مش تمام في حاجه غلط انا مش بخير

وصلت الشغل متاخر طبعا…. لكن كانت الامور هينه

طول مانا قاعده وانا عماله بقول في حاجه هتحصل

وقد كان…. كل الذكريات جت تفكرني ببنت كانت جميله زمان بس ساذجه وغبيه… الحاجه اللي حصلت ان اول ما جتلي الفرصه ادي بالقلم اديت قلم ناعم اوي

انا اتغيرت؟ مبقتش ولا تفتوفه من البنوته الصغيره؟

ولا انا بقالي انياب وبقيت اعرف اضرب؟

اعتقد التانيه لان اللي اخدت القلم مؤذيه

حدسي لسه مبيكدبش

الاحساس الغريب بقى ان البنت دي وحشتني اوي وكنت اتمنى انها متتغيرش ابدا لكنها الدنيا

[dawshadreams]

الانسان تايه عاوز مليون حاجه بيجري ورا مليون اتجاه مش عارف يكتشف هو عاوز ايه الانسان عاوز كل حاجه

هل انا طماعه؟ هل لسه ملقتش الحاجه اللي تخليني استغنى عن كل حاجه تانيه؟

انا عاوزه كل ده سوا

[dawshadreams]

الموضوع بقى مش خوف اني اكون لوحدي

الخوف اني افقد الامان

الخوف اني احارب على حد مبيحاربش عليا

الخوف من كل حاجه

هو انا ليه مش الاختيار الاول في حياة حد؟

انا عملت ايه غلط؟ انا عملت ايه؟ انا معملتش اي حاجه لكل اللي بيحصل

انا حبيت… حبيت بجد وحسيت بمعاني الامان مع حد

ليه يا دنيا ف عز فرحتي قتلتيني بالشكل ده

ليه حسستيني بالخوف ده

ليه دايما بتدخليني ف حرب واختيارات مستحيله

وليه دايما مبكونش اول اختيار؟

انا عمر ما قلبي دق قبل المره دي

وعمري ما هحس بالثقه والامان في الحب لو مكملتش

الحب اتخلق عشان يكمل مش عشان يبعد ويبقى ذكرى

يارب قلبي متوجعه اكتر من كده يارب قدرتك

[dawshadreams]

لو أني أعلم أن الحب خطيرًا جدًا ما أحببت

[dawshadreams]

كل اللي حاسه بيه اني اتضربت ف عز الفرحه … قلبي اتضرب ف عز فرحته وحاسه بعجز شديد كأني متربطه من كل جهه حتى الصريخ ممنوع

بنام من امبارح بطرق اعجازيه … وهما بيقولوا عليا أفورت لكن بجد أنا قلبي ابتُلي في أحب الناس ليه ف ظرف ساعات .. أنا مبقتش عارفه اتكلم إزاي أنا أتمنى إن ده كله يخلص إن الكابوس ده ينتهي بأي شكل .. أنا قلبي شايل وجع مشالوش حد دلوقت حتى صوت نفسي تقيل عليا

[dawshadreams]

ليه كل حاجه صعبه كده؟ مش المفروض كل حاجه تكون بالصعوبه دي

مش المفروض يكون حد واحد شايل في قلبه كل الوجع ده

وجع على شغلي اللي باظ

وجع على دراستي اللي باظت

وجع على اهلي

وجع على اني لوحدي

ووجع على قلبي اللي مش مكتوبله يفرح لحظه وجع على نفسي اني حاسه اني ولا حاجه في حياة اكتر ناس ليها مكانه جواه

مش طبيعي ان شخص واحد يبقى مهموم كده

يارب خفف على قلبي ربنا يخفف عني الحزن ده وكانه مكانش ابدا

انا مستاهلش الحزن ده كل حاجه سهله وبتحصل للناس كلها عندي مبتحصلش بعد ما كنت قريبه اوي اوي منها

[dawshadreams]

انا تعبت من كوني حساسه زيادة عن اللزوم كلمه واحده ممكن تنزلني الارض وتخليني اعيط وازعل زعل كبير وكلمه ترفعني السما…. تعبت مني ومش عارفه اعيش مشاعري زيهم هي دي طبيعتي وهي دي مشاعري غير كده هكون انسان�� مطفية زي ما انا دلوقت مطفية وخايفه ادي اي تعبير عشان محدش يشوفني اوفر … كنت بتعامل معاكوا بطبيعتي ليه كده بجد ليه تحسسوني اني عندي مشكله دي انا مش عاجباكوا؟ طيب دي انا اعمل ايه فيا اموتني يعني ولا اعمل ايه

[dawshadreams]

Drowning into coffee ☕️♥️

[dawshadreams]

النهارده وصلت لمكان شغلي متاخره ساعه وربع بحالها تمام… ربنا سبحانه وتعالى خلى الباب يتقفل من ساعه وانا قاعده بره عماله ارن على اللي جوه يفتح واتواصلت مع الowner ومبانش اني اتاخرت كل ده😂😂… ربنا جميل اوي♥️

[dawshadreams]

اقرلكوا سر…. هو بيهون كل حاجه بشكل حلو اوي

هو جميل اوي ومبسوطه اني اديت نفسي فرصه ومبعدتش عنه بصراحه… وبعيش معاه مشاعر جميله

الماسيدج منه لما بيتطمن عليا عامله ايه او شغلي عامل ايه او لما بنتكلم ف اي حاجه بتبقى كيوت وجميله اوي.. هو الحاجه الوحيده الحلوه ف كل العك اللي انا فيه يارب يفضل جميل ويفضل موجود يارب يارب

[dawshadreams]

هل تعلم ياصديقي؟ انا شخص الحياة دايما بتديله فرصه يرتاح لكنه بيختار التعب بكل ارادته😂😂😂

لكن دايما الاختيار ليه متعة وانبساط خفي كده مش بلاقيها في الراحة

[dawshadreams]

احنا محتاجين ضمان قبل منكلم الناس كلها انها مش هتمشي من غير سبب… قولولنا انكوا هتبعدوا خليكوا صرحا معانا ومع نفسكوا محدش يستاهل حد يبعد عنه من غير سبب بالشكل ده

[dawshadreams]

هو انا فيا ايه غلط… اكيد فيا حاجه غلط لان كل ده مبيحصلش ورا بعضه وانا طبيعية

[dawshadreams]

مفتقده اوي ريحة ايام زمان…. مش ايام زمان بمعناها لا ايام زمان بتاعتي انا

مفتقده اني اشوف افلام ع التليفزيون بعد ما الكل ينام … مفتقده اني اسهر اعمل اي حاجه ملهاش لزمه مفتقده التمرين مفتقده اوي وقت ما كنت صغيره… كنت مبسوطه وطايره كنت عامله زي الفراشه

كان قلبي خفيف مفيهوش كل التقل ده… حتى همومي مكانتش بتعملي مشكله

دلوقت انا تقيله اوي… ومش عارفه افضي اي حاجه من اللي جوايا عشان اخف لان كل حاجه متعلقه ببعضها … اتمنى كل ده يتفك لوحده ربنا يجبر بخاطري يارب

كل حاجه جوايا بحبها مرشوق فيها ازازه مكسوره عماله تقطع ف ايدي وانا ماسكه فيها… عشان اسيب الازازه لازم اسيب الحاجه دي وانا مبقتش قادره استغنى للاسف

يارب حلها من عندك

[dawshadreams]

يارب وقت الاذان اجبر قلبي واديني اللي عاوزاه يا من امره بين الكاف والنون قل لها كن فتكون يارب حتى لو مش خير اجعل فيها الخير يارب ومتحرمنيش منها يارب قدرتك يارب….. انا بتعذب والله بتعذب قلبي عمره ما حس بالكتمه والخوف ده قبل كده يارب قدرتك اجبر قلبي يارب يارب متسبنيش يارب انا كل يوم بتعب اكتر مش عارفه اكل ولا عارفه اتعايش مش عارفه اتعامل خالص انا جسمي كله تقيل وعقلي تقيل حتى صوتي مش حلو قلبي خايف اوي وموجوع يارب قدرتك تجبره يارب يارب اجبره يارب يارب الدعاء بيرد القضاء يارب قدرتك يارب يارب انا مش هقدر احس بالحاجات المتعبه دي اكتر من كده يارب قدرتك يارب يارب عبدك يارب اجبرني

[dawshadreams]

انا خايفه… انا حتى مش عارفه انا عاوزه ايه انا عاوزه حاجه ومش عارفه هقدر اكون فيها ولا لا … كل المشاعر والتفكير ده محصليش قبل كده ابدا كل ده جديد عليا اوي اوي بجد… انا مش عارفه حاسه ان في حاجه اتكتمت جوايا لا عارفه تخرج ولا عارفه تستنى

في حاجه بتوجعني ومش عارفه مكانها مش عارفه اخدلها مسكن وتروح في حاجه جوه معرفش هي ايه كل الفكره اني حزينه اوي اوي كل حاجه بقت صعبه عليا مش قادره اخد حتى خطوة اني اعدي الشارع اني اعمل اي حاجه تقيل يارب اجبر خاطري واديني اللي عاوزاه يارب … اجبر بخاطر قلبي صعب عليه يستحمل اللي ممكن يحصل يارب اجبر خاطري